ఉద్యమంల సమైక్యవాదులే ఎందుకు గెలుస్తున్నరు?

ఉద్యమంల సమైక్యవాదులే ఎందుకు గెలుస్తున్నరు?  ఇది ప్రతి తెలంగాణా వాడిని తొలుస్తున్న ప్రశ్న. అవును, 1956ల ఆంధ్రప్రదేశ్ ఏర్పడ్డ మరుక్షణం నుంచి ఏదోఒక విధంగా పోరాటాలు రగులుతనే ఉన్నయి. అవి అణచి వేయబడుతనే ఉన్నయి. లేదా, కొత్త జీవోలో, కొత్త ఒప్పందాలో తెచ్చి కొత్తఆశలు రేకెత్తించ బడుతున్నయి. ప్రజలు మళ్ళా కొన్నిరోజులు నోర్మూసుక కూర్చుంటున్నరు. సమైక్యవాదపు అసలురంగు మల్లొకసారి బయటపడుతది. మళ్ళా పోరాటాలు మొదలుపెడుతరు. ఇదీ గడిచిన యాభై ఐదేళ్ళ తెలంగాణా ప్రత్యేకవాద చరిత్ర.

ఈ క్రమంల ప్రతీసారీ సమైక్యాంధ్ర వాదులు తెలంగాణా ఉద్యమం పై పైచెయ్యి సాధిస్తున్నట్టు కనపడుతుంది. ముఖ్యంగా నోటివద్దకు వచ్చిన కూడు గుంజుకున్నట్టు మొన్న డిసెంబరు పది నాడు సమైక్యవాదులు ఆడిన దొంగాట, కేంద్రం నిర్ణయాన్ని వెనక్కితీసుకునేటట్టు చేసిన విధం తెలంగాణా ప్రజలను విస్మయానికి గురి చేసింది. ఫలితం వందలాది ఆత్మహత్యలు.

పుండుమీద కారం జల్లినట్టు పదేపదే మీనాయకులు చేతగాని వాళ్ళని, వాజమ్మలని సమైక్యవాదులు దెప్పడం మొదలయ్యింది. వీళ్ళ మాటలు ఎట్ల ఉంటయంటే, అక్కడికి సీమాంధ్ర నాయకులు చాలా గొప్పవాళ్ళని, నిజాయితీ పరులని, ప్రజాసేవయే వాళ్ళకు తెలిసిన విద్య అని. అది నిజం కాదని అందరికీ తెలుసు. అదే నిజమైతే ఒక్కొక్కరి సీటు కింద వేలకోట్ల రూపాయలు కుప్పలుబడి ఉండవు.

పైనించి చూసినప్పుడు తెలంగాణా ఉద్యమం మీద సమైక్యాంధ్ర వాదులు పైచెయ్యి సాధిస్తున్నట్టు కనిపించొచ్చు. అయితే తెలంగాణా ఉద్యమం ఒక ప్రజాఉద్యమం. ప్రజాఉద్యమాలు ఒక్క రాత్రిలో పుట్టుక రావు. ఒక్క రాత్రిలో ఫలితాలు రావు. ఐతే ఉద్యమం సాధించిన విజయాలు లేక పోలేదు. 2009 డిసెంబరు 9 రోజున చిదంబరం చేసిన ప్రకటన వాటిల ఒకటి. 

కాని 1990ల చంద్రశేఖరరావు తెలంగాణా రాష్ట్ర సమితి ఏర్పాటు చేసినంక పరిస్థితి కొంత మారింది. కొన్ని ఆటుపోట్లు ఉన్నా, నిలకడగా ఉద్యమం ముందుకు సాగుడు మొదలు పెట్టింది. చంద్రశేఖరరావు 2004ల కరడు గట్టిన సమైక్యవాది రాజశేఖర్ రెడ్డి తోటి, 2009ల మరో సమైక్యవాది చంద్రబాబు తోటి జట్టు కట్టి ప్రజల కోపానికి గురయ్యిండు. ఆ కోపం ఎన్నికల ఫలితాల రూపంలో బయటపడ్డది. పార్టీపరంగా నష్టపోయినా ఒకవిషయంలో మాత్రం ఆయన విజయం సాధించిండు. రాష్ట్రంలోని రెండు అతిపెద్ద పార్టీలతోని తెలంగాణాపాట పాడించిండు. ముఖ్యంగా ఎన్నడూ తన పార్టీల తెలంగాణా పేరుకూడా ఎత్తనియ్యని చంద్రబాబుతోని జైతెలంగాణా అనిపిచ్చిండు. ఇవి తెలంగాణా ఉద్యమం సాధించిన విజయాలే.

మరి సీమాంధ్ర ఉద్యమం మాటేమిటి? నిజానికి ఎంతోమంది సీమంధ్ర మేధావులు, జర్నలిస్టులు, రాజకీయ నాయకులు, దళిత నాయకులు ప్రత్యేక తెలంగాణా ఉద్యమానికే మద్దతు ఇస్తున్నరు. ఎందుకంటే వాళ్లకు ప్రజావ్యతిరేకత భయం లేదు. ఎందుకంటే సీమాంధ్ర ప్రజలల్ల రాష్ట్రవిభజన మీద వ్యతిరేకత లేదు కాబట్టి. 

సమైక్యవాదులుగా పేరుపడ్డ చంద్రబాబు, జగన్ మోహన్ రెడ్డిలకు మద్దతిచ్చే తెలంగాణా నాయకులు కూడా ఒకవైపు వాళ్ళకు మద్దతు ఇచ్చుకుంటనే, ఇంకోవైపు తెలంగాణా వాదులమని చెప్పుకుంటరు. ఇది హాస్యాస్పదంగ కనిపిచ్చినా, వారికి అది తప్పని అవసరం. ఎందుకంటే వాళ్ళ మనసులల్ల సమైక్య వాదం ఉన్నా బయటికి మాత్రం చెప్పుకోలేని పరిస్థితి. చెప్పుకుంటే ప్రజాగ్రహాన్ని చూడవలసి వస్తది. రాజకీయులకు ప్రజలతోటే పనికదా? అందుకనే ప్రజా వ్యతిరేకమైన సమైక్యరాగాన్ని బహిరంగంగ ఆలపించలేరు.

ఇంకపొతే అసలు విషయం, చిదంబరం ప్రకటన తర్వాత సమైక్యవాదుల గెలుపు. ముందే అనుకున్నట్టు ప్రజా ఉద్యమం ఒక రూపానికి రావాల్నంటే సమయం తీసుకుంటది. కాని డిసెంబరు తొమ్మిది రాత్రి పదకొండు గంటలకు చిదంబరం ప్రకటన చేస్తే ఆర్థరాత్రి సీమాంధ్ర ప్రజలు ఇంకా నిద్రకూడా లేవకముందే సదరు సమైక్యవాద నాయకులు రాజీనామాలు చేస్తరు. ఉదయం పదిగంటలలోపు ఫ్లెక్సీలు, టెంట్లు, స్టేజీలు, కార్లు, జీపులు, పగటి వేషాలు రడీగా తయారయినై. ఇది ఎట్ల సాధ్యమో చిన్నపిలగానికి కూడా అర్థమయ్యేదే. 

ప్రజలు చాల నిదానంగ పనిచేస్తే, వ్యాపార వర్గాలు మాత్రం చాల వేగంగా పావులు కదుపుతయి. సిండికేట్లు ఏర్పాటు చేసుకుంటయి. ఎవరు ఏపని చేయ్యాల్నో నిర్ణయించబడుతది. ఒక వైపునుండి లాబీయింగు జోరందుకుంటది. ప్రత్యర్థికి విషయం అర్థమయ్యే లోపల జరిగే నష్టం జరిగిపోతది. మొత్తంగచూస్తే పదిహేనురోజుల సమైక్యాంధ్ర ఉద్యమం అదేవిధంగ జరిగిందని వేరే చెప్పవలసిన అవసరం లేదు.     

నిర్ణయాలు తెలంగాణాకు అనుకూలంగా వచ్చినప్పుడు ఇట్లాంటి వ్యాపార ఉద్యమాలు ముందుముందు కూడా వస్తయి. వాటిని ఎదుర్కోవడానికి తెలంగాణా ప్రజలు సంసిద్ధులై అప్రమత్తంగా ఉండవలసిన అవసరం ఉన్నది. ప్రజలు ఐకమత్యం తోటి, ఉద్యమం ఆపకుండ ఉధృతం చెయ్యడమే ఈ వర్తక ఉద్యమాలకు సరయిన మందు.  

సమైక్యవాదం గెలిచినట్టు కనబడుడుకు ఇంకొక కారణం కూడ ఉన్నది. సమైక్య వాదులు కోరుతున్నది సమైక్య రాష్ట్రం. అది ఇప్పుడు ఉన్నదే. దానికోసం వాళ్ళు ఏమీ చేసుడు అవసరం లేదు. అదే తెలంగాణా వాదులు కోరుతున్నది రాష్ట్ర విభజన. అంటే రాష్ట్రాన్ని విభజించాలె. రాష్ట్రాన్ని విభజించే వరకు తెలంగాణా వాదులు గెలిచినట్టు కాదు. కాని రాష్ట్రం కలిసి ఉన్నంత వరకు సమైక్య వాదులు గెలుస్తున్నట్టే. అది పైకి కనిపించేది. కాని సమైక్య వాదుల నిజమైన గెలుపు అంటే తెలంగాణా ప్రజల మనసుల నుండి విభజన వాదాన్ని పోగొట్టుడు. ఆ విషయంల మాత్రం సమైక్య వాదులు ఎప్పటికీ గెలువలేరు.