తెలంగాణా నాయకుల్లో ఎవ్వరూ ఆత్మహత్య చేసుకోలేదేం?

అమాయక ప్రజలు తప్ప తెలంగాణా మంత్రులో, ఎంపీలో, ఏమ్మేల్యేలో, ఇతర నాయకులో ఎందుకు ఆత్మహత్య చేసుకోలేదు? 

సమైక్యవాదులుగా చెప్పుకునే కొందరు సీమాంధ్రులు తరచుగా అడిగే ప్రశ్నలల్ల ఇదొకటి. ఏమాత్రం ఆలోచన ఉన్నోనికైనా ఇది ఎంతటి అసంబద్ధమైన ప్రశ్నో ఉత్తగనే తెలుస్తది, ఒక్క సమైక్యాంధ్ర మత్తులో జోగేటోల్లకు తప్ప.

అసలు ఆత్మహత్యలు ఎవరు చేసుకుంటరు? తీవ్రమైన నిస్పృహకు గురైన మానసిక బలహీనులు. నాయకులు ఏ ప్రాంతం వారైనా మానసిక బలహీనులుగా మాత్రం ఉండరు. అట్ల ఉంటె వాళ్ళు నాయకులే కారు. అదీకాక నాయకులు తమ ఉద్వేగాన్ని రకరకాల వేదికల పైన వ్యక్తంచేసే అవకాశం ఉంటది. దాన్ని తమ మనసుల అణచి వేసుకునే అవసరం ఉండదు.   

ఆత్మహత్యలు చేసుకునుడు మంచి పని అని ఎవ్వరు చెప్పడం లేదు. పైగా చేసుకోవద్దని తెలంగాణలో అన్ని పార్టీల నాయకులు, ఉద్యమకారులు పదే పదే ప్రజలకు విజ్ఞప్తి చేస్తనే ఉన్నరు. అయినా ఆత్మహత్యలు ఎందుకు ఆగుత లేవవో విశ్లేషించవలసిన బాధ్యత ప్రభుత్వానికి ఉన్నది. కాని ప్రభుత్వం కనీసం ఆత్మహత్యలను గుర్తిస్తందుకు కూడా నిరాకరిస్తుంది. 

ఇదివరలో అనంతపురంలో రైతుల ఆత్మహత్యలు, సిరిసిల్లలో చేనేత కార్మికుల ఆత్మ హత్యలు జరిగినయి. వీటి మీద నాయకులు రకరకాల వేదికలమీద, అసెంబ్లీల, పార్లమెంటుల చర్చించిన్రు. 2004 ఎన్నికలల్ల రాజశేఖర్ రెడ్డి అయితే కేవలం రైతుల ఆత్మహత్యల అంశం మీదనే అధికారంలకి వచ్చిండు. మరి సమైక్యవాదుల లెక్క ప్రకారం వీళ్ళల్ల కూడా ఎంతో కొంత మంది ఆత్మహత్య చేసుకోవాలెగద? ఒక మూర్ఖపు వాదాన్ని నిలబెట్టుకోవడానికి పదే పదే మూర్ఖపు వాదనలే చెయ్యవలసి వస్తది. సమైక్యాంధ్రులు చేసే ఈ ఆత్మహత్యల వాదన కూడా అటువంటిదే.

ఓ పాతిక మంది రైతులో, చేనేత కార్మికులో ఆత్మహత్య చేసుకుంటేనే విషయం పార్లమెంటు దాంక వెల్తది. అటువంటిది తెలంగాణా అంశం మీద ఆరొందల మంది ఆత్మ హత్యలు చేసుకుంటే అసలే చర్చ జరుగకుండా ఎట్ల ఉంటది? ఆత్మహత్యలు ఎవ్వరూ చేసుకో గూడదు, సరే. కాని జరిగిన, జరుగుతున్న ఆత్మహత్యల గురించి చర్చే జరగ కూడదంటే, చర్చించే వాడు కూడ ఆత్మహత్యే చేసుకోవాలె అని వాదించడంల ఈ సమైక్య వాదుల ఉద్ద్యేశం ఏంది?

రైతుల ఆత్మహత్యల గురించి చర్చించడం ప్రభుత్వానికి ఇష్టం ఉండదు. అందుకనే అజీర్తితో చచ్చినరని, మరొకటని రైతుల  ఆత్మహత్యలను అధికారంలో ఉన్న వాళ్ళు పలుచన చెయ్యడం మనం చూసినం. ఎందుకు వాళ్ళు అట్ల అనవలసి వచ్చింది? ఎందుకంటే వాళ్లకు వీటిపై చర్చించడం ఇష్టం ఉండదు. ఎందుకంటే అది ప్రభుత్వ లోపాలను చూపెడుతది. 

అలాగే సమైక్యవాదులకు తెలంగాణా ఆత్మహత్యల మీద చర్చించడం ఇష్టం ఉండదు. ఎందుకంటే అవి ప్రజల్లో ఉన్న బలమైన తెలంగాణా రాష్ట్ర ఆకాంక్షను బయట పెడుతయి. మరి వీరికి అటువంటి ఆకాంక్షలు బయట పడుడు ఎట్ల ఇష్టం ఉంటది? అందుకనే ఆ విషయం పైన చర్చ జరగకుండ అణగదొక్కాలె. అంటే చర్చించే వాణ్ణి నువ్వే ఆత్మహత్య చేసుకొమ్మని అనాలె. అప్పుడు వాడుగూడ నోర్మూసుకొని ఊరుకుంటడు. కబ్జాకోరు, ఫాక్షనిస్టు, ఫాసిస్టు సమైక్యవాదపు వ్యూహాల్లో ఇదొకటి, ఎదుటివాడు వాదించకుండ గొంతు నొక్కుడు.   

ఏమాత్రం అభిలషనీయం కాకపోయినా, ప్రపంచంలో మొదటిసారిగా తెలంగాణాలో ఆత్మహత్య అనేది ఒక ఉద్యమ రూపం సంతరించుకుందన్నది ఒక కఠోర వాస్తవం. త్వరితంగా ప్రత్యేకరాష్ట్రం ఏర్పాటే వీటి ముగింపుకు కల ఏకైక పరిష్కారం.