హైదరాబాదు ఎవరికి చెందాలి?

అసలు ఈ ప్రశ్నే ఒక పెద్ద తెలివి తక్కువ ప్రశ్న. ఎందుకు? ఏ నగరమైనా దేనికి చెందుతుంది? ఆ నగరం ఏ భూభాగంలో వుందో ఆ భూభాగానికి. ఆ నగరం ఆంద్రప్రదేశ్ లో వుంది కాబట్టి ఆంధ్రప్రదేశ్ కి చెందుతుంది. అలా కాకుండా ఏ కర్నాటక వాడో, మహారాష్ట్ర వాడో వచ్చి 'ఒకప్పుడు మా వాళ్ళు కొందరికి హైదరాబాదు రాజధానిగా వుంది కాబట్టి హైదరాబాదుని మాకిచ్చేయండి' అంటే ఎలా వుంటుంది?

హైదరాబాదు రాష్ట్రం విభజింప బడినపుడు హైదరాబాదు పట్టణం గురించి చర్చ ఎందుకు రాలేదు? అప్పుడు కూడా అది దేశంలో ఐదవ అతిపెద్ద నగరం. ఇప్పుడు కాదనుకోండి. ఇప్పుడు బెంగులూరుతో ఆ హోదా పంచుకోవలసి వస్తుంది. కాని అప్పట్లో అది దేశంలో ఐదో పెద్ద నగరం. మరి మహారాష్ట్రీయులు అంత సులభంగా ఎందుకు వదిలి పెట్టారబ్బా? పోనీ మహారాష్ట్రులకు ముంబాయి వుంది కాబట్టి వదిలి పెట్టారనుకుందాం. మరి కర్నాటక వారు ఎందుకు వదిలి పెట్టినట్టో? వారికి అప్పట్లో అంత పెద్ద నగరం లేదు కదా మరి? ఎందుకంటే వారికి మన సమైక్య వాదులమని చెప్పుకు తిరిగే సోదరులకున్నంత తెలివితేటలు లేవు గాబట్టి.

లేకపోతే వాళ్ళూ అనే వాళ్ళేమో, 'హైదరాబాదులో మా పెట్టుబడులున్నాయి, కాబట్టి హైదరాబాదు మాదే' అని. కాని వాళ్ళు అనలేదు. బహుశా తమ భూభాగంలో లేని నగరం తమదని అడగోచ్చన్న ఇంగిత ఙ్ఞానం లేకపోయినా ఉండొచ్చు. లేదా వారికి సమైక్యవాదం ముసుగులో ఇతరుల నగరాల మీద గాలం వేసే విద్య తెలియక పోవచ్చు. ఏదైనా అదిప్పుడు చరిత్ర. ఆ సంగతి వదిలేద్దాం.

అసలు ఇప్పుడు ఆవు తోలు తీసేసి తోడేలు కోరలు బయటికి చూపించడం మొదలు పెట్టిన సమైక్యవాదుల మని చెప్పుకొనే భాగ్యనగర వాంఛాపీడితులు చెప్పేదేమిటో చూద్దాం.

ఇది రాజధాని అనుకుని ఇక్కడికొచ్చి పెట్టుబడులు పెట్టాం. ఇప్పుడు ఉన్నపళంగా పొమ్మని అంటే ఎక్కడికి పోతాం?

ఎవరైనా పెట్టుబడులు పెట్టేది స్వలాభాలకోసం. రాజధానికోసం పెట్టుబడులు పెట్టామంటే ఎవరూ నమ్మరు. రాజధాని వుందని కాక లాభాలు ఎక్కువ వచ్చే ప్రాంతంలోనే పెట్టుబడులు పెడతారు. అందుకే దేశ రాజధాని ఢిల్లీకన్నా ముంబై, చెన్నై, బెంగుళూరులలో ఎక్కువ పెట్టుబడులు పెడతారు. 

ఇలాంటి వాదనలు చేసే వారిలో పెద్ద ఘనాపాటి అయిన లగడపాటి 'పదమూడు రాష్ట్రాల్లో పెట్టుబడులు పెట్టానని' స్వయంగా ప్రకటించాడు. అంతెందుకు? ఏంటో మంది మన దేశంలో కాక విదేశీ నగరాల్లో కూడా పెట్టుబడులు పెట్టారు.  

ఏ పట్టణంలో నైనా లాభాల కోసం పెట్టుబడులు పెట్టాక లాభాలే కోరాలి, అంతే కాని న్యూయార్కులో పెట్టుబడులు పెట్టాం కాబట్టి న్యూయార్కు నాదనో, ముంబాయిలో పెట్టుబడులు పెట్టాం గాబట్టి ముంబాయి నాదనో వాదిస్తే ఎలాంటి  ఎలాంటి వడ్డింపు జరుగుతుందో ఇక్కడ కూడా అలాంటి వద్దిమ్పే జరుగుతుందని గ్రహించాలి.

ఇక్కడికొచ్చి దీన్ని అభివృద్ధి చేశాం.

ఏ నగరమైనా దానికి సహజ వనరులతో అభివృద్ధి చెందే అవకాశం వుంటే అది అభివృద్ధి చెందుతుంది. అలాంటి వెసులుబాటు లేకపొతే ఎన్ని పెట్టుబడులు పెట్టినా అది కాలగర్భంలో కలిసి పోతుంది.చరిత్ర పరిశీలిస్తే ఎన్నో ప్రాచీన  నగరాలకన్నా అతివేగంగా అభివృద్ధి చెందినా నగరం హైదరాబాదు. ముందే చెప్పినట్టు అరవై ఏళ్ల క్రిందటే అది దేశంలో ఐదో పెద్ద నగరం. ఇప్పడు ఆరో స్థానం. అభివృద్ధి చెందినా నగరాన్ని చూసి పెట్టుబడులు పెడితే నగరాన్ని అభివృద్ధి చేసినట్టు కాదు, నగరం వాళ్ళ అభివృద్ధి చెందినట్టు అవుతుంది. 

నిజంగా అంత అభివృద్ధి చేయాలనే తపన గలవారు, చేయగల సత్తా ఉన్నవారే ఐతే ఇప్పుడు తమ ప్రాంతంలో మరో పల్లెటూరుని రాజధాని చేసుకొని దాన్ని నిరభ్యంతరంగా అభివృద్ధి చేయవచ్చు. అప్పుడు అభివృద్ధి చేశామని జబ్బలూ చరచుకోవచ్చు.

ఇది ఉమ్మడి రాజధాని కాబట్టి అభివృద్ధి చెందింది. ఇంత అభివృద్ధి చెందినాక చూస్తూ చూస్తూ మీకు వదులుకోవడానికి మాకు చేతులెలా వస్తాయి?

వదులు కోవడానికి మీరెవరు? మీరు వచ్చేటప్పుడు ఈ నగరాన్ని మీతో తీసుకు రాలేదు. ఇప్పుడు వెళ్లి పోయేటప్పుడు ఎలా మీతో తీసుకు పోగలమనుకుంటున్నారు?

ఇది మొదటి నుండి దేశంలో వున్న పెద్ద నగరాల్లో ఒకటి. దీని మీద వచ్చే ఆదాయం చాలా ఎక్కువ. ఉమ్మడి రాష్ట్రం ఏర్పడ్డ తర్వాత ఏదశలో కూడా హైదరాబాదు రెవెన్యూ రాష్ట్రానికి ఉపయోగ పడిందే కానీ, రాష్ట్రం రెవెన్యూ హైదరాబాదు ఉపయోగించుకోలేదు. ఫెడరల్ వ్యవస్థ కాకపోవడంవల్ల మన దేశానికి ఈ సదుపాయం వుంది. ఆ కారణంగానే సమైక్యవాదుల చేత నడప బడుతున్న రాష్ట్ర ప్రభుత్వం శ్రీకృష్ణ కమిటీ ప్రాంతాల వారీ జమా ఖర్చులు అడిగినప్పుడు ఇవ్వలేదు. ఆ లెక్కలు బయటికి తీస్తే, అప్పుడు తెలుస్తుంది, హైదరాబాదు రాబడెంతో, ఖర్చెంతో. 

అంతెందుకు? హైదరాబాదు ఆదాయం మీది ఆశతోనే కదా సమైక్యవాదులం అని చెప్పుకొనే వారు హైదరాబాదు మీద మాత్రమే పట్టుబట్టేది? అందుకే గదా సగం మంది సీమాంధ్రులు హైదరాబాదేతర తెలంగాణలో వున్నా, కేవలం హైదరాబాదులో వున్న సీమాంధ్రుల భద్రత గురించి మాత్రమే బాధపడేది? ఇతర పార్టీల హామీలంటే లెక్క లేదు. మరి మజ్లిసువారు, దానం వారు కూడా హైదరాబాదులోని సీమాంధ్రుల భద్రత పైన ప్రత్యేక హామీలిస్తున్నారు మరి! అవి కూడా పట్టించుకోరు. హైదరాబాదేతర సీమాన్ద్రులను మాత్రం తెరాస వారి దయాదాక్షిన్యాలకే వదిలేస్తామంటారు. ఇదంతా ఎందుకు? హైదరాబాదు ఆదాయమ్మీది ఆశతో కాదా?  

తెలంగాణా మీద అంత ప్రేమ వున్నవారు హైదరాబాదుని మీరే వదులుకోవచ్చు కదా?

ఎందుకు వదులుకోవాలి? మీరు గొంతెమ్మ కోరికలు కోరుతున్నారు కాబట్టి వదులుకోవాలా? హైదరాబాదు నగరం తెలంగాణాలో సహజసిద్ధమైన అంతర్భాగం. అది అంతర్భాగంగానే వుంటుంది. ఆంద్రప్రదేశ్ ఏర్పడ్డప్పుడు ఎలా ఐతే అది రాష్ట్రంలో అంతర్భాగంగా వుందో ఇప్పుడూ అలాగే అది భౌగోళికంగా ఏ రాష్ట్రంలో వుందో ఆ రాష్ట్రంలోనే అంతర్భాగంగా వుంటుంది. 

భౌగోళికంగా తెలంగాణలో అంతర్భాగంగా వున్న హైదరాబాదు లేకుండా తెలంగాణా రాష్ట్రం వుండదు. ఇంతవరకు అలాంటి రాష్ట్రం మన దేశంలో ఎప్పుడూ ఏర్పడలేదు. ఇక ముందు కూడా ఏర్పడే అవకాశం లేదు.