హైదరాబాదు తెలంగాణాది, కాకపోతే ఎవరైనా ఇక్కడ ఉండొచ్చు

హైదరాబాదు ఎవరికీ చెందాలి అనే టపా పెట్టగానే లోపల హైదరాబాదు మీద కోరిక పెట్టుకుని పైకి సమైక్యాంధ్ర అని మాట్లాడే కొంతమందికి కోపాలు వచ్చినట్టున్నాయి. వారి కోపతాపాలను తోచిన విధంగా ప్రకటిస్తున్నారు. వారి భాష, అందులోని పనికిరాని చెత్త పదాలన్నిటినీ తీసివేసి వారి ఆక్రోశాన్ని అర్థం చేసుకోవడానికి ప్రయత్నించాను. సహజంగా చెత్త విమర్శలకి మనం సమాధానాలివ్వం. కాని గురుడు హైదరాబాదు మీద తనకు హక్కే లేదని బాధ పాడుతుండే సరికి నా వివరణ వ్రాయాలనిపించింది.  

ఈ దేశంలోని ఏ నగరమైనా ఎవరిది? ఈ దేశంలోని ప్రతి ఒక్కరిది. అంటే ఈ దేశంలోని ప్రతి ఒక్కరు తమకు నచ్చిన చోటికి వెళ్లి బ్రతకవచ్చన్న మాట. అంతవరకే ఈ నగరం అందరిదీ.

అంతే కానీ బొంబాయి నగరం నాది, దాన్ని మా రాష్ట్రంలో కలపాలి అంటే? అది తెలివిలేని తనం తప్ప మరోటి కాదు. మనం ఒక నగరంలోకి వెళ్లి జీవించే, వ్యాపారం చేసుకునే హక్కు వేరు, ఆ నగరమే నాదనే హక్కు వేరు. నేను వ్యాపారం చేసుకున్నాను కాబట్టి ఆ నగరం నాదే అనడమయితే మూర్ఖత్వానికి పరాకాష్ట. సరిగ్గా మన సమైక్యవాద సోదరులు చేసే వాదన అదే.

ఏ ప్రాంతం వారైనా ఎక్కడికైనా వెళ్లి చట్టబద్ధంగా వ్యాపారాలు చేసుకునే వెసులుబాటు తప్పకుండా వుంటుంది. కాని ఈస్టిండియా కంపెనీల మాదిరిగా వ్యాపారాలతో మొదలు పెట్టి ప్రాంతాన్నే గుప్పెట్లో పెట్టుకుందాం. శాశ్వత కాలనీగా మారుద్దాం. ఆ ప్రాంతపు ప్రజల హక్కుల్ని కాలరాద్దాం ఆంటే ఊరుకునే సమస్యే లేదు. 

ప్రాంతం ఆంటే అదేదో చిన్నా చితకా ప్రాంతం కాదు. చిన్నా చితకా ప్రాంతమే అయ్యుంటే న్యాయమో అన్యాయమో నోర్మూసుకొని పది ఉండేది. కాని తెలంగాణా నాలుక్కోట్ల జనాభా గల ఒక పెద్ద ప్రదేశం. దేశంలో వున్న పద్దెనిమిది రాష్ట్రాల కన్నా వైశాల్యంలోనూ, జనాభాలోనూ పెద్దది. 

కానీ దురదృష్ట వశాత్తూ దానికన్నా పెద్ద రాష్ట్రమైన ఆంధ్రాకి కాలనీగా మారింది. మందబలం ఆంధ్రాది కాబట్టి తెలంగాణాకి చెందవలసిన ప్రజాస్వామిక హక్కులు తృణీకరించ బడుతున్నాయి. పెద్దమనుషుల ఒప్పందాన్ని మొదలుకొని ఒక్కొక్కటిగా తెలంగాణాకి చెందిన అన్ని హక్కులు వమ్ము చేయబడ్డాయి. ఆ హక్కులను కాపాడుకోవడం కోసమే తెలంగాణా వాదులు అస్తిత్వ పోరాటం చేస్తున్నారు. తెలంగాణాలో అంతర్భాగంగా వున్న హైదరాబాదు కూడా ఆ హక్కుల్లో ఒకటి. అన్ని హక్కులతో పాటు ఆ హక్కు కూడా తెలంగాణా ప్రజలు సాధించుకుని తీరతారు.