పోచారం, జర చూసుకొని పో

తనకు వోటు వెయ్యని వారిని పోచారం శ్రీనివాస రెడ్డి తెలంగాణా ద్రోహులుగా ముద్ర వేయడం అభ్యంతర కరమైన విషయం. ప్రజాస్వామ్యంలో ప్రజలకు ఎవరికైనా వోటు వేసే హక్కు వుంటుంది. ఆ క్రమంలో కొందరు కాంగ్రెస్ పార్టీకి వోటు వేస్తే తప్పేంటి?

నిజానికి పోచారానికి గత ఎలక్షన్ల కంటే ఇప్పుడు రెట్టింపు మెజారిటీ వచ్చింది. అప్పుడు కూడా తెలుగుదేశం, తెరాస కలిసి పోటీ చేశాయి. అయినా కూడా ఇప్పుడు రెట్టింపు వోట్లు వచ్చాయంటే అది కేవలం ఉద్యమ తీవ్రతవల్ల మాత్రమే.

నిజానికి తెలుగుదేశం పార్టీలో వున్నప్పుడు పోచారం ఆ ప్రాంతంలో తెలంగాణా వాదులకు, తెలంగాణా పేరెత్తిన వారికి చేసిన సన్మానాలు ఇంకా చాలామంది మరచి పోలేదు. అయినా కూడా పెద్ద మెజారిటీతో గెలిపించారంటే కారణం ఆయన్ను చూసి కాదు, తెలంగాణా వాదాన్ని గెలిపిద్దామని మాత్రమే. ఆ క్రమంలో కొంత వ్యతిరేక వోటు పక్కవాడికి పడడంలో ఆశ్చర్యం కనిపించదు. పోచారం ఈరోజు పార్టీ మారి తెరాస తీర్థం పుచ్చుకోగానే సిసలైన తెలంగాణా వాదిగా మారిపోయాడని అందరూ నమ్మాలనేముంది?

ఇక్కడ గమనించ వలసిన ఇంకో విషయమేమిటంటే, అక్కడ పోటీ చేసింది ఇద్దరే ఇద్దరు అభ్యర్థులు. కాంగ్రెస్ అభ్యర్థి అయిన శ్రీనివాస గౌడ్ కూడా తెలంగాణా ఇచ్చేదీ తెచ్చేదీ మేమే అంటూ బలంగా ప్రచారం చేయడం ఇక్కడ గమనిచాల్సిన విషయం. అటువంటప్పుడు పోచారానికి వ్యతిరేకంగా పడ్డ వోట్లు తెలంగాణాకి వ్యతిరేకంగా పడ్డట్టు ఎలా అవుతాయి?

దీనికి తోడు అక్కడ గిరిజనుల జనాభా కూడా ఎక్కువగానే వుంది. అమాయకులైన గిరిజనులు వారి నేతలు ఏం చెప్తే అదే వింటారు. ఆ గిరిజన నాయకులను కాంగ్రెస్ డబ్బుతో కొనడం పెద్ద విషయం కాదు. ఇలాంటివి నివారించాలంటే తెలంగాణా ఆవశ్యకత గిరించి మరింత లోతుగా వారికి వివరించే ప్రయత్నం చేయాలి తప్ప వారిని ద్వేషించడం పరిష్కారం కాదు. 

తెలంగాణా రాష్ట్ర సమితిలో చేరగానే తెలంగాణావాది ఐపోడని, తెలంగాణా నిజాయితీగా పోరాడినప్పుడే ప్రజల విశ్వాసం చూరగొంటాడని ఇప్పటికైనా పోచారం గ్రహిస్తే మంచిది.