యాదిరెడ్డీ, నీకు నా ఉద్యమాంజలి

ప్రపంచంలో ఇప్పటి వరకు ఎక్కడా కనీ వినీ ఎరగని విధంగా తెలంగాణా ఉద్యమంలో ఆత్మహత్యలు ఒక పోరాట రూపాన్ని సంతరించు కోవడం అత్యంత బాధాకరమైన విషయం. ఇతరుల ప్రాణాలు తీయడం కన్నా తనను తానూ ఆత్మాహుతి చేసుకోవడానికి ఎక్కువ తెగువ అవసరం. తన ప్రాణాన్ని తృణప్రాయంగా తలచిన వాడు ఏమైనా చేయగలడు. కాని తెలంగాణా పోరు బిడ్డలు తమ ప్రాణ త్యాగాల ద్వారా వారి ప్రఘాఢమైన ఆకాంక్షను ప్రపంచానికి తెలియబరుస్తున్నారు తప్ప చీమకు కూడా హాని తలపెట్టడం లేదు.

పరిస్థితులు ఇలా వుంటే సీమాంధ్ర మీడియా మాత్రం ప్రతీరోజూ తెలంగాణా వాదులు నరుకుతున్నట్టుగా, చంపుతున్నట్టుగా అసత్య ప్రచారాలు చేస్తుంది. ఎప్పుడో ఎవరో ఆవేశంలో ఏదో మీటింగులో ఏదో అనడం అంతటా జరిగేదే. సమైక్యాంధ్ర వాదం చేసే పయ్యావుల ఆత్మాహుతి దాడుల గురించి మాట్లాడినపుడు తెలంగాణా వారు ఎప్పుడో 'జాగో భాగో' అని అన్న దాన్ని మరిచి పోకుండా దాదాపు ప్రతి రోజూ, ప్రతి సీమాధ్ర మీడియాలోనూ చర్విత చర్వనంగా ప్రచారం చేస్తుంటారు.

ఈ పక్షపాత మీడియా మాయాజాలంలో, ఈ రాష్ట్ర ప్రభుత్వ సీమాంద్ర పక్షపాతంతో, తెలంగాణా ప్రజా ప్రతినిధుల అలసత్వంలో, సీమాంధ్ర నాయకుల కుతంత్రాల మధ్యన, కేంద్ర ప్రభుత్వం చేతగాని తనం నేపథ్యంలో మరో తెలంగాణా బిడ్డ నేల రాలాడు. తన గొంతు డిల్లీలో వినిపించడానికి డిల్లీ వెళ్లి మరీ ఉరిపోసుకుని చనిపోయాడు. 

ఎక్కడో న్యూయార్కులోనో, ఆస్ట్రేలియాలోనో ఎవడైనా తెలుగోడు చనిపోతే పుంఖాను పుంఖాలుగా ప్రసారాలు చేసే సీమంధ్ర మీడియా కనీసం యాదిరెడ్డి మరణ వాంగ్మూలాన్ని, దానిలోని వివరాలను ప్రసారం చేసిన పాపాన పోలేదు. తన ఉత్తరంలో తెలంగాణా ద్రోహులని తన పది పేజీల లేఖలో పేరు పేరునా ఉదాహరించిన యాదిరెడ్డిది, ఏదో సాదా సీదా ఆత్మహత్య అని ఎలా అనుకోగలం?

యాదిరెడ్డి మరణం, డిల్లీని ప్రభావితం చేయకుండా రాష్ట్ర ప్రభుత్వం చేయని కుట్రలేదు. ఆంధ్ర ప్రదేశ్ భావంలో యాదిరెడ్డి భౌతిక కాయానికి శ్రద్ధాంజలి ఘటిద్దామనే తెలంగాణా వాదుల, ప్రజా ప్రతినిధుల ఆలోచనలకు విరుద్ధంగా చకచకా పావులు కదిపింది. ఏపీ భవన్లో ఉన్న చందర్రావు అనే సీమాంధ్ర తైనాతీతో గలీజు ఉత్తరం ఒకటి రాయించింది. పోస్టుమార్టం చేసిన ఆస్పత్రి నుంచి కనీసం అక్కడున్న ఎంపీలకు, మంత్రులకు కూడా తెలియకుండా ఎకాఎకీ స్మశానానికి తరలించమనే దాని సారాంశం.

దొంగల్లాగా భౌతిక కాయాన్ని స్వంత ఊరు పెద్దమంగళారం తలలించారు. ఆ సమయంలో శంషాబాద్ ప్రాంతం అంటా కరెంటు తీసేశారు. 

తెలంగాణా వాదాన్ని, తెలంగాణా వాదులను చూసి ఇంత అదురుకునే ఈ సమైక్యవాద ప్రభుత్వం ఇంకేన్నాల్లో నిలబడే అవకాశం గాని, అర్హత గాని ఇంకెంతమాత్రం లేదు.

యాదిరెడ్డీ, నీ త్యాగం ఊరికే పోదు. తెలంగాణా రాష్ట్రం వచ్చి తీరుతుంది.