బాబు డైరెక్షన్, తెదెపా తమ్ముళ్ళ యాక్షన్

బాబు దర్శకత్వంల తెలంగాణా తెలుగుదేశం ఎమ్మెల్యేలు మహా రంజుగా యాక్షన్ చేస్తున్నరు. మరి వీరి యాక్షన్ తెలంగాణా ప్రజలు ఏవిధంగ స్వీకరిస్తరో చూడవలసి ఉంది.

మొన్నటిదాకా ప్రజలకు మొఖం చూపలేక మన్నుదిన్న పాముల్లెక్క, ఒడ్డున బడ్డ చేపల్లెక్క ఉన్న వీళ్ళు కాంగ్రెస్ వాళ్ళు రాజీనామాలు చేయంగనె ఎక్కడ వెనుక బడి పోతమో అన్నట్టు ఉరుక్కుంట రాజీనామాలు చేసిన్రు. అదీ బాబు పర్మిషన్ తోటి.

ఒకవైపు వీళ్ళతోటి రాజీనామాలు చేయించిన చంద్రబాబు, ఇంకో పక్క పయ్యావుల కేశవ్ ను "జై సమైక్యాంధ్ర" అనమని ఉసిగొల్పుతడు.

ఇన్నాళ్ళు జనానికి మొహం చాటేసిన వీళ్ళు, రాజీనామాలు చేయంగనె ఎప్పుడెప్పుడు ప్రజల దగ్గరికి పోదామా అని ఈన్నావుల్లెక్క ఉరుకులాడుడు మొదలు పెట్టిన్రు. అందుకని బస్సుయాత్ర మొదలు పెట్టిన్రు.

మొదలైతె పెట్టిన్రు గని మనసుల ఏదో అనుమానం, వీళ్ళ యాక్టింగు జనం పసిగట్టి తరిమికొడుతరేమోనని! ఎందుకైనా మంచిదని JAC కాడికి పొయిన్రు. 

శనివారం మీటింగు పెట్టినం,అప్పటిదాక ఆగున్రి అని JAC వాళ్ళు చెప్పిన్రట. వెంటనే వీళ్ళు బాబు దగ్గరికి పొయ్యి మంతనాలు జేసిన్రు. బాబు ఏం పురెక్కిచ్చిండో ఏమో, బయటికొచ్చి JAC మీద సయ్యి మనుకుంట లేచిన్రు.

"మేం రాజీనామాలు చేసినా మమ్మల్ని అడుగకుంట 48 గంటల బందు పెట్టిన్రు. అందుకని మేం JACల కలువం" అని వీరి వాదన.

మరి ఎవర్ని అడిగి వీరు బస్సుయాత్ర పెట్టుకున్నరో అది మాత్రం చెప్పరు. వీళ్ళ కోపానికి అసలు విషయం ఇంకోటి ఉన్నది, JACల కలువాలంటె సమైక్యవాది చంద్ర బాబు పేరు ఎక్కడా ఎత్తవద్దని JAC వాళ్ళు కోరిన్రు.

మరి సహజంగనే రోజూ చంద్రబాబు బూట్లు నాకితె గాని తెల్లారని వీరికి ఆ మాట అంటె కోపం వచ్చుడుల ఆశ్చర్య మేముంది?

కాని వీరికి అర్థం గాని విషయం ఒకటుంది. ఎమ్మెల్యే పదవులకు రాజీనామాలు చేసిన వీళ్ళు నెత్తిన రూపాయి పెడితే పావలాకు కూడా అమ్ముడు పోని రకం. రాజీనామాలు చేసినంత మాత్రాన వీల్లు చేసిన లెక్క మొత్తం మరిచిపోయేటంత అవివేకులు కారు ఇప్పటి తెలంగాణా ప్రజలు. అన్ని చూస్తనే ఉన్నరు.