కుడితిలో పడ్డ కాంగ్రెస్

కేకు చెయ్యాలంటే పిండి మిశ్రమాన్ని కలిపి కావలసినంత సమయం పాటు ఓవెన్ లో పెట్టాలి. ఆ కావలసిన సమయం గంట సేపు అనుకుందాం. మరి గంట కాకుండా పది గంటలు పెడితే? ఇరవై గంటలో, ముప్పై గంటలో పెడితే? అలా ఓ ముప్పై గంటలు పెట్టిన తర్వాత బొగ్గు కాకుండా కేకే కావాలని ఆశిస్తే ఎట్ల ఉంటది?

సరిగ్గా అట్లనే ఉంది మన కాంగ్రెస్ పార్టీ పరిస్థితి. అది తెలంగాణా సమస్యను పరిష్కరించే ఉద్దేశం ఏమాత్రం లేకుండా, ఏళ్ళ తరబడి నానబెట్టి, ఇప్పుడు కూడా పరిష్కరించే ఉద్దేశం లేకుండా ఎలా లబ్ది పొందాలా అని ఆలోచించడమంటే, అది మాడి పోయిన కేకు బాగచేసే ప్రయత్నమే.   

2001 ల కేసీయార్ పార్టీ స్థాపించినప్పుడు, ఆ పార్టీ తెలంగాణా సాధిస్తదని ఎవ్వరూ పెద్దగా ఆశించ లేదు. కాకపొతే తెలంగాణా వాణి గట్టిగా వినిపించే వేదిక ఒకటి దొరికిందని సంబూర పడ్డరు. 

కాని 2004 ల కాంగ్రెస్ తో టీయారెస్ జతకట్టి, ఆ ఎన్నికల్లో రాష్ట్రంలో, కేంద్రంలో కాంగ్రెస్ పార్టీ విజేతగా నిలవడంతో ప్రజలల్ల తెలంగాణా రాష్ట్ర ఏర్పాటుపై ఆశలు చిగురించినై. తెలంగాణా ఏర్పాటు తధ్యమని నమ్మకం కలిగింది. కాని రాజశేఖర్ రెడ్డి ఒంటెద్దు పోకడలతోటి ఆ ఆశల మీద నీళ్ళు చల్లిండు. తద్వారా 2009 ఎన్నికల వరకూ పరిస్థితి లో ఏమాత్రం పురోగతి లేకుండ పొయ్యింది.

2009 ల ఇంకో అద్భుతం జరిగింది. సమైక్యవాదం నరనరానా జీర్ణించుకున్న నారా చంద్రబాబు సీట్లకు కక్కుర్తి పడి జై తెలంగాణా అన్నడు. ప్రణభ్ ముఖర్జీకి అట్లని ఉత్తరం పంపిచ్చిండు. అంతే కాదు, ఆ ఎన్నికల్ల కాంగ్రెస్ పార్టీ కూడా తెలంగాణాకు కట్టుబడి ఉన్నమనే చెప్పి పోటీ చేసింది. ఆ విధంగా రాష్ట్రంల ఒక్క సీపీయం తప్ప తెలంగాణా ఏర్పాటుని వ్యతిరేకించే పార్టీ లేకుంట అయ్యింది. ఆ సీపీయం కూడా తాను తెలంగాణాకి అడ్డంకి కానని చెప్పి మహాకూటమి లో కలిసి ఎన్నికల్లో పాల్గొంది.

అన్ని పార్టీలు తెలంగాణా తెస్తమనే చెప్పడంతోటి తెలంగాణా ప్రజలు ఏ ఒక్క పార్టీనో గెలిపించలేక పోయిన్రు. జాతీయ పార్టీ అని నమ్మకంతో తెస్తే గిస్తే అదే తెస్తుందనే నమ్మకంతో కాంగ్రేసుని గెలిపిస్తే, తాను అన్నానంటే తప్పక చేస్తానని అన్న చంద్రబాబు మాటలని నమ్మి తెలుగుదేశానికి కూడా బాగానే సీట్లిచ్చిన్రు. మధ్యలో సమైక్యవాద పార్టీ అయిన తెలుగుదేశంతో పొత్తు పెట్టున్నందుకు కేసీయార్ బాగనే మూల్యం చెల్లించిండు. అయినా సరే వ్యూహాత్మకంగా చంద్రబాబుతో తెలంగాణా అనుకూల ప్రకటన చేయించడం ద్వారా ఆయన పెద్ద విజయమే సాధించిండు.

2009 లో తెలంగాణా ప్రాంతంలో ఎన్నికల తంతు పూర్తీ కాగానే తెలంగాణా వెన్నులో మొదటి బాకు దిగింది. అది దింపింది రాజశేఖర్ రెడ్డి. ఎన్నికలు పూర్తైన మరుక్షణం నంద్యాల మీటింగులో, రాహుల్ గాంధీ సమక్షంలో, తెలంగాణా విడి పొతే హైదరాబాదుకి వీసా తీసుకుని వెళ్ళవలసి ఉంటదని తొండి మాటలు చెప్పిండు రాజశేఖర్ రెడ్డి.

తెలంగాణా ఉసురే పోసుకున్నడో, తన మాటలకు మూల్యమే చెల్లించు కున్నడో తెలువదు గని,  కొద్ది రోజులకే ఆయన అత్యంత ఘోరమైన పరిస్తితులల్ల కాలధర్మం చేసిండు. ఆ విధంగా తెలంగాణాకు ఉన్న పెద్ద అడ్డంకి తొలిగినట్టయింది. అదును చూసి కేసీయార్ నిరాహార దీక్ష చేసిండు. ఆ సమయంలో ఉవ్వెత్తున లేచిన ప్రజా వెల్లువ చూసి కాంగ్రెస్ పార్టీ తెలంగాణా ప్రక్రియ మొదలయినట్టు ప్రకటించింది.

ప్రకటించి ఇరవై నాలుగ్గంటలు కాకముందే తెలంగాణ వెన్నులో రెండో బాకు దింపిండు చంద్రబాబు. తాను స్వయంగా రెండు రోజుల ముందే అసెంబ్లీలో చెప్పిన మాటలనే పూర్వపక్షం చేస్తూ కేంద్ర నిర్ణయాన్ని వ్యతిరేకించిండు. సీమాంధ్ర నాయకుల కుట్రలకు ఎన్టీయార్ ట్రస్టు భవన్ వేదికగా నాయకత్వం వహించిండు. ఇది తెలంగాణా ప్రజల హృదయాల్లో తీరని గాయం రేపింది.ఫలితం, తెలంగాణాలో బలంగా పాతుక పోయిన తెలుగు దేశం పార్టీకి ఉప ఎన్నికల్లో అన్ని స్థానాల్లో డిపాజిట్లు కూడా రాకపోవడం.

ఆ తర్వాత చంద్రబాబు కాని, ఇతర నాయకులు కాని తెలంగాణాల పర్యటించడానికి కూడా వీలు కాలేదు. చెరువులో నుండి బయట పడ్డ చేప పిల్లల మాదిరి తయారయింది తెలంగాణా టీడీపీ వారి పరిస్థితి. 

కాంగ్రెస్ పరిస్థితి కూడా ఏమంత మెరుగ్గా లేదు. తాము విధించుకున్న జూన్ 30 డెడ్ లైన్ కూడా ముగియడంతో కాంగ్రెస్ వారికి ప్రజల వద్ద ముఖం నిలపాలంటే రాజీనామాలు తప్ప వేరే గత్యంతరం లేక పోయింది. అలాగే వారు పెద్ద సంఖ్యలో రాజీనామాలు చేసిన్రు. తెలుగుదేశం వారికి కూడా ప్రజల ముందుకు రావడానికి ఇదో గొప్ప సువర్ణావకాశం లాగ కనిపించింది. అనుదుకే కాంగ్రెస్ వాళ్ళకంటే గంట ముందుగానే తమ రాజీనామాలు సమర్పించిన్రు.

ఇప్పుడు ఏదో ఒకటి చేయవలసిన పరిస్థితి కాంగ్రెస్ అధిష్టానానిది. ఇంత కాలం సమస్యను నాన బెట్టిన ఫలితంగా ఏం చేసినా కాంగ్రెస్ కి లాభించేలా లేదు. నష్టాన్ని తగ్గించు కోవడమే ఇప్పుడు చేయవలసిన పని.

ఇప్పుడు తమంత తాము రాజీనామాలు ఉపసంహరించు కుంటే ప్రజలు కాంగ్రెస్ నాయకులని ఎప్పటికీ క్షమించరు. వారు కనీసం తెలంగాణా ప్రాంతంల తిరగ్గలిగేది కూడా అనుమానమే. అలా అని తెలంగాణా రాకుండా వారు మళ్ళీ ఏం మొఖం పెట్టుకొని ఎన్నికల్లో పోటీ చేయగలరు? తెలంగాణా కాంగ్రెస్ నాయకులకు ఇప్పుడు తెలంగాణా సాధించడం తప్ప వేరే మార్గం లేదు. వారు మళ్ళీ ఈ ప్రాంతంలో పోటీ చేయాలంటే తెలంగాణా అయిన తీసుకు రావాలి లేదా పార్టీ వీడి టీఆరెస్ టికెట్ మీద అయినా పోటీ చేయాలి.

చంద్రబాబుతో తెలంగాణాకు అనుకూలంగా మరో స్పష్టమైన ప్రకటన ఇప్పించకుండా తెలంగాణా తెలుగుదేశం వారు ఎన్నికల్లో గెలవడం కల్ల. అలాంటి ప్రకటన చేసినా గతంలో ఏరుదాటి తెప్ప తగలేసిన బాబుని జనం నమ్మడం కష్టమే. రాజీనామాలు చేసినంత మాత్రాన సమైక్య నాయకుని క్రింద ఉన్న తెలుగు తమ్ముళ్ళను తెలంగాణా వారు నమ్మరు. చంద్రబాబు ప్రకటన కాని, తెలుగుదేశం విభజన కాని అనివార్యంగా జరిగే పరిణామం.

ఇక టీఆరెస్ పరిస్థితికి మాత్రం ఏం ధోకా లేదు. తెలంగాణా రావడం లేటైన కొద్దీ అది మరింత బలపడుతుంది. 2014 ఎన్నకల్లో అది 90 % అసెంబ్లీ, పార్లమెంట్ సీట్లు గెలుచుకోవడం ఖాయం. ఒక వేళ ముందే తెలంగాణా వచ్చినా ఆ క్రెడిట్ దానికే దక్కుతుంది.