ఎవడు వాడు?

రాష్ట్రాలను
దేశాలను
వీలైతే ప్రపంచాన్నీ
ఏర్పాటు చేసే అధికారం
తనకు మాత్రమే ఉందని భ్రమించే వాడు

రాష్ట్ర సమగ్రత
దేశ సమగ్రత
ప్రపంచ సమగ్రత కూడా...
కాపాడే బాధ్యత
నేత్తినేసు కుంటున్నానని అపోహ పడేవాడు

నీరు మాత్రమే కాదు
ఫాక్టరీలూ ఉద్యోగాలూ
బొగ్గూ కరెంటూ
కేటాయింపులూ  కళాశాలలూ
అన్నీ పల్లానికే ప్రవహించాలని అనుకునే వాడు

అడవులు జంతువులూ
గనులూ జనులూ
పారే నేలకన్నా
ఎక్కువ నేల మునిగిపోయినా
తనకు మాత్రం మూడో కారు పండితే చాలనే వాడు

భాషను గేలి చేస్తూ
సంస్కృతిని కించ పరుస్తూ
లోలోన ఆసహ్యించు కుంటూ
పైకి కృతకపు నవ్వులు పులుముకుని
ఆంధ్రులం మనమంతా, అన్నదమ్ములం అనేవాడు